vocavit autem Iacob filios suos et ait eis congregamini ut
adnuntiem quae ventura sunt vobis diebus novissimis
congregamini et audite filii Iacob audite Israhel patrem
vestrum
Ruben primogenitus meus tu fortitudo mea et principium
doloris mei prior in donis maior imperio
effusus es sicut aqua non crescas quia ascendisti cubile
patris tui et maculasti stratum eius
Symeon et Levi fratres vasa iniquitatis bellantia
in consilio eorum ne veniat anima mea et in coetu illorum
non sit gloria mea quia in furore suo occiderunt virum et in
voluntate sua suffoderunt murum
maledictus furor eorum quia pertinax et indignatio illorum
quia dura dividam eos in Iacob et dispergam illos in Israhel
Iuda te laudabunt fratres tui manus tua in cervicibus
inimicorum tuorum adorabunt te filii patris tui
catulus leonis Iuda a praeda fili mi ascendisti requiescens
accubuisti ut leo et quasi leaena quis suscitabit eum
non auferetur sceptrum de Iuda et dux de femoribus eius
donec veniat qui mittendus est et ipse erit expectatio gentium
ligans ad vineam pullum suum et ad vitem o fili mi asinam
suam lavabit vino stolam suam et sanguine uvae pallium suum
pulchriores oculi eius vino et dentes lacte candidiores
Zabulon in litore maris habitabit et in statione navium
pertingens usque ad Sidonem
Isachar asinus fortis accubans inter terminos
vidit requiem quod esset bona et terram quod optima et
subposuit umerum suum ad portandum factusque est tributis
serviens
Dan iudicabit populum suum sicut et alia tribus Israhel
fiat Dan coluber in via cerastes in semita mordens ungulas
equi ut cadat ascensor eius retro
salutare tuum expectabo Domine
Gad accinctus proeliabitur ante eum et ipse accingetur
retrorsum
Aser pinguis panis eius et praebebit delicias regibus
Nepthalim cervus emissus et dans eloquia pulchritudinis
filius adcrescens Ioseph filius adcrescens et decorus
aspectu filiae discurrerunt super murum
sed exasperaverunt eum et iurgati sunt invideruntque illi
habentes iacula
sedit in forti arcus eius et dissoluta sunt vincula
brachiorum et manuum illius per manus potentis Iacob inde
pastor egressus est lapis Israhel
Deus patris tui erit adiutor tuus et Omnipotens benedicet
tibi benedictionibus caeli desuper benedictionibus abyssi
iacentis deorsum benedictionibus uberum et vulvae
benedictiones patris tui confortatae sunt benedictionibus
patrum eius donec veniret desiderium collium aeternorum fiant
in capite Ioseph et in vertice nazarei inter fratres suos
Beniamin lupus rapax mane comedet praedam et vespere
dividet spolia
omnes hii in tribubus Israhel duodecim haec locutus est
eis pater suus benedixitque singulis benedictionibus propriis
et praecepit eis dicens ego congregor ad populum meum
sepelite me cum patribus meis in spelunca duplici quae est in
agro Ephron Hetthei
contra Mambre in terra Chanaan quam emit Abraham cum agro
ab Ephron Hettheo in possessionem sepulchri
ibi sepelierunt eum et Sarram uxorem eius ibi sepultus est
Isaac cum Rebecca coniuge ibi et Lia condita iacet
finitisque mandatis quibus filios instruebat collegit
pedes suos super lectulum et obiit adpositusque est ad populum
suum
